გურამ სიხარულიძე - სამი კომაროველი, სამი მათემატიკოსი, სამი კოლეგა და პარტნიორი ბრიჯში და, რაც მთავარია - სამი მეგობარი. ვინ? რა თქმა უნდა - ოლეგ კვეტენაძე, ნუგზარ მახათაძე და გურამ სიხარულიძე.
ბათუმში დაბადებული, ბ-ნი გურამი 1969 წელს ჩამოვიდა თბილისში, რათა ესწავლა მათემატიკურ სკოლაში - არჩევანი გააკეთა კომაროვის სახელობის სკოლა-ინტერნატზე. შემდეგ სწავლა განაგრძო თსუ-ს მექანიკა-მათემატიკის ფაკულტეტზე, ხოლო უმაღლესის დამთავრებისთანავე სკოლაში დაიწყო მუშაობა - ჯერ 115-ე, შემდეგ 67-ე, 1986 წლიდან კი - 42-ე. როგორც ჩვენი სკოლის ყველა წამყვანი პედაგოგი, ბ-ნი გურამი უმაღლესი კვალიფიკაციის მასწავლებელია, არის მრავალ რესპუბლიკურ და სოროსის ოლიმპიადებში გამარჯვებულების აღმზრდელი.
ახალგაზრდობაში სამეჯლისო ცეკვებში არაერთგზის ლაურეატი, ბ-ნი გურამი სანატრელი მასწავლებელია ყველა იმ ბავშვისათვის, ვინც ერთხელ მაინც დაესწრო მის გაკვეთილს. ძალიან წყნარი, არაჩვეულებრივი პედაგოგიური მიდგომით, ბავშვების მიმართ კეთილად განწყობილი, ის ყოველთვის ცდილობს არა მხოლოდ შეასწავლოს, არამედ შეაყვაროს მათ მათემატიკა.
ორი მშვენიერი გოგონას მამაა - უფროსი თათია ჩვენი სკოლის წარჩინებული მოსწავლეა.